Archiv 2017

Über uns >> Archiv 2017

Plattdüütsch bi dat Roote Krüüz in Oterndörp

Dieter Seidler, een Oterndörper Jung, de in Hamborg bi de Füürwehr arbeit hett, keem to uns, um uns ut sien Böker wat to vertellen.

Plattdüütsche Geschichten üm un to Oterndörp, lustige un ok truurige! So vertellt he öber de Oterndörper Giftmördersche, dat Oterndörper Ostertor, Tante Ernas Lebensmittelloden in de Landeshüser Stroot, de höögere Döchterschool; he snackt vun Besöök ut Amerika, Maskeraad op`n Kaisersool vun Kröger Edu Eibsen un vun „Klein Paris“, so nömen de Cuxhobener de Oterndörper an`n Anfang vun`t twintigsten Johrhunnert. Üm 1900 geev dat in de Kreisstadt bi cirka 1800 Inwohners 24 Kneipen un 12 Fest-Solen. Jo, Feste fiern, dat kunnen de Oterndörper. De Stimmung weer ümmers best op den „Turnerball“, den „Realschölerball“ oder den „Füührwehrball“ un besünners temperamentvull un vörnehm gung dat to op den „Fischer-Schipper- un Börgerball“. Schon in`n Johr 1903 hebbt de Utwannerers no Amerika, de nu bi Verwandten in`n ganzen Kreis Land Hodeln to Bseuk ween, bi „Peick`s Sommergarten“ den „Amerikaball“ fiert.
So wat bi söventig Tohörer güngen tofreden na Huus. Dank an Dieter, de sien Böker as „Hinnak Prange-Diers“ schrieven deit. „Kiek wedder in un holl di fuchtig“!

zurück zur Übersicht